ما يعجبك في الدهر كان طولو والناس يصولو ويجولو

المعلم شادد فرش   أيّامو في ها الدنيا معدودة

قيّموه من العرش    بعد ماكانت سقيه ممدودة

قدّاش لمّ فلوس؟؟؟

على قلبو كدوس كدوس

كفر ولّى هبال

يكدّس في الذهب والمال

واللّه ماكذبش الّي قال

مايدوم حــــال

يا حاكم سبحانو الحيّ الدايـــم

الحقّ مسيرو قايم

ولا يبقى الجاه ولا المال إلّي في جيوبك نايم

تلصّق فيه في الحيوط؟؟؟

يرجع لمّاليــه ويفوت عليك الفــوت

ما يدوم في الواد كان حجرو      والباقي مسيرو الرواسي

ومايعجبك في الدهر كان طولو     تفناو انتم ويبقاو الكراسي

تتعاركو عليها بالبوني

تعفّصو الخلق وتعملو الدوني

تتناحرو على بقعة 

عشنا وشفنا صحّة الرقعة

يقوم واحد يجي الثاني

وكلكم بشر ماهو إلاّ فانــي

وماهي إلاّ بلاصة 

وكلكم عليها عسّاسة

مايفلح فيها كان الّي فعلو  باهي

كافي الناس شرّو وبشؤونو لاهي

الكراسي كلات قلوبكم وردّتنا في عالم غريب

لا تفرّق فيه العدوّ من الحبيـــب

والّي يظهر أرنب يطلع ذيــــب

دهر غلاّب و طويل

مقسوم نهار وليل

ماتخرج منّو كان مغلوب وبقلب عليل

وراحة البال 

مايشريهاش مال

تربّعتو علة الكراسي ولمّيتو الثروة الكلّ

والشعب راسو عالي مايرضاش الذلّ

موتو يا كلاب ونعيشو عيشة فــــــلّ

..