كلام الشعب للحكّام ... كلام من القلب للقلب

الحكاية ليوم على عصفور جريح
مادد جناحاتو للريــح

يحبّ السلم والسلام
يحبّ الأمن والأمان
أمّا موش باش يهفت كان ما يطمان

الحكاية ليوم حكاية شعب متماسك
يحبّ يبدى صفحة جديدة
بآمال عظيمة ونظرة للأمور بعيدة

توقعاتو كبيرة وطموحو فوق كلّ إعتبار
يستكمل سيادتو وبثقة يكمّل في نفس المسار

مسار الثورة والحرية
الكرامة والهويــة

الشعب هذا ياسادة
 يحبّ شكون يحكمو من غير ما يحكم فيه
شكون يسوسو و يسايس عليــه
يأسرو من غير ما يحصرو

الشعب محتاج لحاكم يملى الفراغ
يكون على قياسو
يرعى مصالحو ويفهم إحساسو

يعملّو ألف حساب
وما يسكّرش في وجهو الأبواب

ما يتعدّى على حـدّ وماينسى شيّ
يخطفها وهيّ طايرة و قلبو حيّ

الحاكم لازمو يفهم من الومية
ويقرى نظرة العينين
والضحكة والبسمة والدمعة
والأحمر المورّد على الخدّين

نظهر نصدر في الأحكام وناشد في الحكّام
أمّا كلامي كلام
 لكلّ الحكّام

اللّي فهمهم ثقيل وديما على قدّام

اللّي ما يبدلوش الثنية
وعاملين في عباد ربّي و فيّا

كلامي كلام الشعب
كلام من القلب للقلب