لا إلاه إلاّ اللّه و الفرح واتانا كلّ من عادانا هاو جانا و هنّانا

قلت نشدّ الثنية ويرجع الواحد يخدم على روحو
عبيت الساك ياخي شعرة لواحد لطلعت روحو
..
لا ثمّة خروج ولا سفر
لا ثمة قراية ولا زمّارة العيد
...
و تحلّت عنيّا على أكبر حقيقة
ماعاش تكلموني على الحرية
على الكرامة والديمقراطية
كلّو بلّوط في بلّوط
..
أحنا شعب "كلكم راع وكلكم مسؤول عن رعيته
شعب رعية وكلّ واحد حاسب روحو الراعي
..
قيمنا منّا فينا
ماأعزها وماأغلاها علينا
ترصّ ريـــض ماتتحلش في العريض
سكّر أسكت غمّ خبّي
أستر ما ستر ربي
خلّي الأمر يستراح
والصباح رباح
...
منين جاتنا هاالحرية ما عندناش في القاموس
ولاهي في العادة والعرف والناموس

وما أصعبها كلمة لا
وماأكذبهم كي قالو ماتجيب بلا
...
نكتب والدمعة على خدّي
نشكي والكلمة هاربة من يدّي

سحابة وغيمت قدّام عنيّا
ونرجع لسؤالي القديم: آشني آخرتها؟

وكي العادة يقعد القلم والقرطاس
وقت الغصرة هوما اللّي فيهم الخلاص
...
قالو ثورة الأحرار
كنّا نحلمو بيه ها النهار
جانا وقلنا احسن أفار
حبسونا وشدّينا الدار
..
مسيرة وراء مسيرة
وموش باش توفا هاالسيرة
شبعة إحتجاجات
والاكريموجان عجاجات عجاجات
من الإنتفاضة للخماضة
وساحة الحكومة خيمة لقافلة التحرير
والّي صار شكون كان يقول باش يصير
..
هاو هبّ علينا الغنّوشي
والأنصار عرضوه في المطار
يناديو بالحجاب وتحلّ علينا هالباب
ويحبّو على النقاب والحساب والعقاب
يا سيدي مالأخرّ اللحية أبجل مالحرية

لحية وحصيرة
أربعة نساء ونفضّو هالسيرة

قلّو ثورة الأحرار قلّو ثورة الأنصار

ضلموها وضلمونا كي سمّاوها ثورة الياسمين
خذاوها وخذاونا بالعيــــــن

مالغنّوشي للغنوشي مشات الثورة بلّوشي

هزّو الثورة وحطّو الريــحة
ريحة الأكريموجان عجاجات عجاجات
وحكايات حكايات
تبدى وتوفى في الإحتجاجات
...
لا إلاه إلاّ الّله والفرح واتانا
كلّ من عادانا
هاو جانا وهنّانـــــــــــــــــا
...