الحلقة 3: ما بعد الليلة المبروكة

قمنا اليوم الصباح نقاّو المبزع شدّ البلاصة
دارت عليهم الكلّ ولاّو عليها عسّاسة
هاي واسعة وعريضة للّي عينو فيها
والّي عندو شحطة في قلبو ولاّ شاهيها
رئاسة الجمهورية ولاّت كي التكية
و ما أكبرها بلاصة ما أكبرها بلاصة
...
شهزّ حمل على أكتافو رئيس الجمهورية
ما خلاّ ما حمّل روحو مالمسؤولية
واليوم سكدناه وتحطت على أكتافنا هالمسؤولية
على أكتاف كل واحد منّا وأحنا اليوم "كلنا يد وحدة"ا
...

في يدنا 60 يوم            ما يدوم حال
لافيهم راحة ولانوم      لين يتقعد الحال
...

 ستين يوم نسكدو فيهم البقية
نراجعو فيهم الدستور والمجلة الإنتخابية

ستين يوم نمسحو فيهم لحمر
ونرجعو تراب بلادنا أخضر

لحمر لون السقّاط اللّي سلبو البلاد
لون الدم لون النار اللّي كلات لعباد

أحنا اللّي لا نفهمو في السياسة
ولانا على الكراسي عسّاسة

آمالنا حكاية أخرى

حكاية أخرى نقشناها في التاريخ
كلنا يد وحدة دخلنا تاريخ جديد

مافيهش كلمة ديمقراطية وتعددية
فيه كلمة عزة وكرامة وطنية
فيه كلمة تونسي حرّ وماأحلاها الحرية

نتنفسو الحرية بعد ماكان مقصوص علينا الهواء
وبأحلام ما زالت بعيدة نشيعو عنينا للسماء
...
الليلة على غير عادة غامرني الحماس
متفائلة بالمستقيل ونحكي باحساس
خلينا في الّي صار موش اللّي باش يصير
حمد اللّه ياربي وربي يقدر الخير
...
سرقة ونهب, لا ترحملهم عضمة, البلاد جيّروها
أمّا بذراعنا وراس لحنينا نبنيووها
ونوقفو على سقينا يدنا في يدّ بعضنا
ونحميو كرامتنا وحريتنا ونعمرو أرضنا
...
لبلاد جيروها قلّك سراق وباندية
وين كانوا متخبيين؟ أنا مايجدش عليا
خلّي واسكت على التلفزة التونسية
تهزّ و تصبط و موش لاقية الثنية

تونيزيانا تفرق في الدنارات
على مايوقع في الحوم والغوابي والعمارات
أمّا شبابنا واقف وقفة رجال مسكرين الكياسات
يعرضو بالزلاّط للمافيات والعصابات

عبد الرزاق في وضع خطير
على راس القايمة ولازمو يطير
نحبّو حرية رأي و تعبير
ومن هنا وغادي هاكا شباش يصير

أوكا شبابنا مدّو وجوهم على نسمة
بنديرمان أولهم ولاّ من أبطال الحرية
وها الثورة المعلوماتية
ياخويا شوفو وين وصلتنا"99بالمية"ا
"ياسبحان بنديرمان مغير الألوان"

بقيّة الحكاية على البلدان العربية
نذكروها بالخير الميت مايجيش نجبدوه بالخايب
لا حياة لمن تنادي غمت على الحكاية خايفة لايخلطها الطشّ
شي يعدي وأحنا في عصر أنفلونزا الخنازير
الهواء وحدو يعدي
والحرية حاشاهم تعدي
...
المعلم البارح عداها ليلة في السماء
بعد اللّي هي ليلة هبطت عليه مالسماء
يدور ويعقل ماقاش وين يبات
دخلت أمورو بعضها وكثرت عليه لحسابات
ساركوزي مايحبش داصر
وبرلسكوني عندو سهرية مع قاصر
عليه وهلى الكعبة قبلة التايبين
يتكي فيها راسّو ويعدّي فيها هالليلتين
الجماعة يسدّو على بعضهم في وقت الشدّة
غير برك مايوليش ضيف ثقيل ويطول في المدّة
..
وما أشبّو القذافي كي مدّ وجهو وتكلم
قلبو يامّا وجعو على المعلم
قالهم واش تبيوا موش كان رضتو خير
هذا داخل في حيط وظاهرلي لازمو يطير

في عقلو ما عندو علاش لاحق
تالق سقيه فاضي ورايق
وشعبو ضايع مزطّل وغارق
في خبر كان وماهواش فايق

أبدع بصراحة في هاك الكلمتين
ضحكنا في ليلة صعيبة والناس خايفين
......
نهار طويل وكلامي طويل
طوالت الهدرة ووفا علينا الليل

توّا نرقد وبالي مرتاح
إلّي تونس باش يطلع فيها صباح

صباح الحرية والكرامة الوطنية
وماعلينا كان نكونوا قدّ المسؤةلية

طيّرنا سيادتو
والشعب أثبت سيادتو

أمّا إلّي مازال أصعب ملّي صار
أحنا رمينا أرواحنا في بحر ومارسيناش على برّ
...