صبّ الدواء في العين العورة

توّا الّي كانوا يخدموا في البلاد ولاّو زقلعية
يقتلو في العباد ووجوهم كي وجوه المادرية
حرّاس الرئاسة ياسيادي فوق 9 آلاف
ولاد حلال ناس ملاح ورجال نظاف ضراف
شنّي شنّك مع الجيش الوطني أوكم دارو على بعضهم
علّمهم جنّدهم عمّرهم وهاو بالازم سلّحهم
على راسهم مدير الأمن الرئاسي
وين كان متخبّي ياناسي
شدّوه اليوم في بنقردان
مقطّع حاسب روحو لايدان
على علي هذا السرياطي
عدّا عمرو يشاطي ويباطي
وأحنا واكلينّا بالهفّ
آش يطلع منهم مهفّ وراء مهفّ
برامج ومخططات وشؤون إدارية
خدمة مافيات وعصابات كلّها غمّة ومحسوبية
يحبّو يدخلو فينا غولة
 قال شنو الغالي خلّى بلاصتو
وأحنا لا والي لا مولى
قام بعثلنا قنّاصتو
البركة بالجيش الوطني يدورو كماين وطيّارات
وشبابنا وخيرة رجالنا يعرضو للعصابات
...
المعلّم جا على برّة
وبالّي يعمل مشى فرد مرّة
وهدّو الّي كانو متخبيين لبرّة
الهمامي المرزوقي المكي والغنوشي
باش تمشي ثورتنا حرام وبلّوشي
عينيهم مزغللة للسلطة كي الذيبّة الجيعانة
الشكارة والبحرولا واحد فيهم قدّ الأمانة
واحد اسلامي وواحد من حزب العمّال الشيوعي
وكلهم على بعضهم لافيهم واحد موضوعي
الّي يحبّ يأمم المؤسسات
والّي ناوي يكسينا كبابس وفولارات
...
والّي ينطق الواحد من أجنابو: ويني ثورة الشباب؟
أحنا الّي استقدمنا حرقنا رواحنا وانتفضنا وحلينا الباب؟
تقمنا وتحطينا وشدّينا في كلمة لا
وهوما من غادي هبطو علينا كي البلا
سمّاوها انتفاضة الشباب
أمّا باقي هوما هوما نفس الشيّاب
زعمة أحنا حررنا البلاد ولاّ كنا وقيدة في يدّ الساسة
 يغمونا وياكلونا بالهفّ بعد الّي ولاّت سناسة
...
على قدّ ما فرحت البارح
اليوم لارتحت ولاجاني نوم
دخلت كبة خرجت قيام
شكون في ها اللعبة شادد الزمام؟
معارضة زواولة ولاّ مافيات
نفوذ سياسة ولاّ تنمية بالجهات
تخلطت لموروالثقة ماتت في العباد
ظلامت في عينينا شنو مستقبل البلاد؟
...
ما أخمجها السياسة والساسة على عضمة مغججين كي الكلاب
ما يفهموش بالسياسة ولا يخافو حساب ولاعقاب
لبارح نحكي على الحرية الكرامة والوطنية
ليوم ضاق عليّا الخناق
وين ندوّر وجهي يلسعني النفاق
ماتت الثقة والأمن غايب
ماء يجري تحت سقينا والشي سايب
...
غدوة يبدى العدّ التنازلي في ها المرحلة الإنتقالية
نبداوها بتشكيل الحكومة الإئتلافية
وبشوية الشيّاب نكملو الثنية
...
على بالي سؤال قعد في قلبي شحطة:
فماشي بالإمكان نبداو مرحلة جديدة
عنوانها الإقدام ونضرتها للأمور بعيدة
وميسالش ندخلو الشباب
ونحلّو لرؤية جديدة الباب
ونعمروا مجلس النواب
ونخرجو جميع الكلاب
تحبّو على النضج والمسؤولية
نحبّو على التفتح الثورة والحرية
يزيونا مالكلام البايت
والتقدم الّي علينا فايت
حق لكل الفئات
حق لكل الجهات
يشدّو سيادتهم التكيّة
و نكملو أحنا الثنيّة
...