المخاض

يا شعب تونس يرحم الميمة اللّي جابتك
...

اليوم حالنا كي الصغير ,خرّج راسو في ها الدنيا يبكي و يصيح
خبز وماء وبن علي لا
يبكي ويصيح وعلى فمّو كان كلمة لا
يا وليّدي خوذ المصّاصة؟ لا
يا وليّدي هاي كعبة حلوة؟لا لا
إيجا لماما ؟ لا لا لا
يا قنّشو يا قنّوشو ؟ لا لا لا لا
صغير.. خايف .. ضايع ..
يبكي دم
يعيّط يزيّط .. يصيح ما حبّش يريض
ما يريض كان ما يرضى
ما يسكت كان ما يقّى اللّي يرسم الضحكة على فمّو
...
البارح جمهور كورة
 نخسروا نكسّروا ... نربحوا نزمّروا
ليوم لا زمامر لا زغاريد
لا باكووات حليب في السماء
ولايمشي دمّنا ماء
...

لمعلم قال فهمنا البارح وليوم هزّ كشوشو و قطّع
زعمة يبدّل في ساعة بساعة أخرى ؟
يبدّل في الجوذ خاطر موش في خلوقو ؟
ولاّ فهم إلّي هوّ وجماعتو ماعاش عندهم في السوق مايذوقو؟
زعمة فهمنا بالوقت؟
ولاّ يربح في الوقت؟
...
أيها المواطنون أيتها المواطنات
 الزين ماقاش وين يبات

يعمل في دورة وماعندو علاش يخاف
جماعتو راهم ناس نظاف

يسايسولو على البلاصة
طول عمرهم عسّاسة

هاو حطّ الغنوشي  والناس يا سيدي قلبو الصحن
ما نحبوش الغنوشي كان يولّي الخبز بلّوشي
  ...
يا سيادي أحنا شباب  قراونا الدستور قريه وحير فيه
السيد موش باش يخليها واسعة و عريضة موش هاينة عليه
 يستهبل فينا وأحنا شادين الفايسبوك ولاهيين كان بيه
...

خلاّنا بشحطتنا في قلوبنا
نسهو ونجاوبو
زعمة؟ زعمة؟
...
آشني آخرتها؟
...
أمّا اللّي يقعد في البال
و أهم مالسؤال
مايدوم جاه ولامال
كلو يمشي ... كان عزتنا وكرامتنا ورفعتنا بين البلدان
هذي حكاية ماكانتش في الحسبان
نسجلوها في تاريخ الإنسان
...
يا شعب تونس يرحم هالأمّ إلّي جابتك
ويرحم والديه هالفايسبوك كي ماخلاّناش بشحطتنا في قلوبنا
...