خنّار وزير الداخلية وحكومة الوحدة الوطنية

ليوم نهار حكومة الوحدة الوطنية
من تسميتها وظيفتها شرعيتها …
مشاكلو تبدى وما توفاش
ونفس الحزب المسوّس الّي باقي مامشاش
...
عباد باقي متحمسة تخرج للشوارع قال شنو مسيرة
تحلّ علينا هالباب ودرا وين باش ترسّي هالسيرة
زعمة تتصلح لمور ونقولو أحسن أفار
ولاّ نرجعو لنفس المعبوكة ولا كان منّو ولا صار
...
الحق الدنيا هفتت بالباهي
والناس رجعت تاكل في خبزتها
وكل واحد بشؤونو لاهي
ينشد آشني آخرتها
...
وزير الداخلية حل فمّو وتكلم
يشكي يعاتب ويلوم متأزم
يحكم علّي فات والّي صار
وقدّامو ليستة بالأضرار
 قتيل 94 جريح 78
  وباقي الوضع موش مريح
33 معتمدية 13 بلدية 
 وشكون يتحمل المسؤولية
46 مركز حرس وطني و 85 للأمن القومي
هاك حال الّي يتعرض لعامل يومي
11 مصنع 66 مساحة تجارية
وما سلمتش الفروع البنكية
خلّي واسكت على أكبر الأضرار
التصدير بركة 1000 مليون دينار
..
السيد موش عاجبو الوضع
شكون يعرف عليه شي يحبّ
و 23 سنة من القمع
ما جاوهشي شي عجب
يكعرر ويعاود إشاعات لا ثمّة عصابات ولامافيات
سيادتو موش حاسس بالذنب
قالك "تونس الأمن والأمان, النظام العام قبل كل شي, جهاز الأمن يقوم بواجبو.."
اسمعو ياسيدك يابن سيدك مواصل في نفس الدرب
...
خليتو يغنجق في الفاضل متاع الخطابات
و قدامو كمشة قراطس وأوراق ودوسيات
"تظافر الوطننين المخلصين"
..  لاسامحونا يا جماعة بالأحرى المسوّسين
"تظافر الوطنيين الصادقين"
.. هذا غالط  في كلامو يقصد المنافقين
هذا زادة يغلطو فيه
لا خير لا في غيرو لافيه
...
دورت على واحد خلافو عندو ما يسمع ويقول
مدّلنا الليستة الجديدة سماهم مسؤول مسؤول
أسامي قديمة نعرفوها
ووجوه في المناسبات السعيدة نشوفوها
كان شوية المعارضين
في الغصرة متلمدين
فرقوهم على الوزارات
وخرجو المعتقلين من الحبوسات
والّي يقعد في البال هي هاك اللجان
لجنة التحقيق في الفساد
باش تتقعد البلاد
ولجنة الأصلاح السياسي على راسها عياض بن عاشور
خلي توقف الدولة على سقيها والعجلة دوووووووور
...
نرجع لسؤالي القديم: آشني آخرتها؟
جماعة هفتت اللعب شوية قال شنو مرحلة انتقالية
وجماعة سخونة شادّة صحيح في نفس الثنية
...
الريحة خرجت على برّا
فلّ وياسمين الحرية
جزائر الأردن ومصر مصرّة
يتبعو نفس الثنية
الناس حفضوها صنعة
 يشعلو في أرواحهم النار
الثورة ولاّت بدعة
ويبداوها بالإنتحار
صنعاء داخلة بعضها ونواكشط خلطلها الطشّ
من المحيط إلى الخليج ..
أهااااه ... سامحونا الخليج مانجبدوّهش
اللّه لا يقدر محصّن مضمّن
محمي من عين العذّال
محمية  للأطراف الإجرامية والفوائد المالية والثروات الشعبية
.. طويل شوية الإسم أمّا موش حرام في أشقاءنا المكرمين
حماة العزة والدين
أوكا شبابو متفتح ولاّت ووصلتلو الأخبار
فايسبوك مسجات  زعمة أحسن أفااار
قدمولنا نصائح ثمينة قالو ثورة الصلاّح
والبلاد باش تتقعد غير قولو حي على الفلاح
البلاد هذي تحررت كي خرج عدو الإسلام
وكان بلاصتو فارغة توّا يبعثولنا إمام
...
يا عبادي هذه حكاية اليوم
الّي صاير والّي قاعد يصير
كل ليلة قبل ما يجيني نوم
ندعي ربي يقدّر الخير
نستناو باللحظة والدقيقة
كان بركة ترجعلنا الثقة
ترجع في شعبنا الروح
وريحة الحرية تفوح
...