عشنا وشفنا تونس الثورة عمشاء عرجاء وعورة

تونس اليوم بلاد الإعتصامات

بلاد الإحتجاجات

بلاد المسيرات 

والمظاهرات

من القصبة للبسّاج للأفونـــي

من منصف باي باب سعدون حتّى لمنّوبة

ناس منكوبة وناس مغلوبة وناس مرعوبة

ساحة الحكومة ولاّت ساحة الإعتصام 

هاكة شينفع فيها البلاد

نمشيوها بالسّيف بما يرضي العباد

كلّو إلاّ قلبان القيستة

حارة بردقان وزاورة لين ينظفو الليستة

ليستة تمشي وليستة تجي

تبدا المسيرة في البسّاج تابعة حزب التحرير يحبّو الخلافة ودولة أسلامية

وما توصل قدّام المسرح البلدي كان تسمع شكون ينادي بالعلمانيّة

مسيرة وراء مسيرة سلمية وأمن وأمان

وساعات ضرب بوني وصياح وأكريموجان

شويّا تلامذة على شويّا بطّالة والبقيّة يهدّو من القهاوي والجوامع

من جماعة لا لا لا ومعندي حتّى مانع

الفاضي والصايع والرّايق

والّي الحال بيه ضايق

ماعاش نسهل سؤالي القديم            ونقول آشني آخرتها؟

باش نتبّع ونشوف      ونعيش كلّ لحظة بلحظتها

عشنا وشفنا تونس الثورة             عمشاء عرجاء وعورة

عشنا وشفنا ما بعد التغيير       الّي صار والّي قاعد يصير

وربّي يقدّر الّي فيه الخير

...