البارح نهار جمعة ولاونّو القذّافي موش مستعرف بيه أمّا هوّا نهار عظيم
عدّاه المصريين في ميدان التحرير وفي تونس حكايتو تبدا وما توفاش...ا
...
اللّه أكبر اللّه أكبر
ونحرو واحد في منّوبة
قلّك قسّ
ناس ملاح وماعملش حسّ
لا يخبّش لا يدبّش
قالولو إيجا لهنا تحبّ ولاّ ماتحبشّ
"يجيك البلا يا غافل
من شيرة هذا ومن شيرة هدّو على البورديل
ونساء عبد اللّه غشّ
تقطع عليهم الطشّ
...
اللّه وأكبر اللّه أكبر
والخنّار يزيد ويكبر
والهباد تهلّل وتكبّر
تهزّ من شيرة تحطّ في شيرة
تهز من الجابية تحطّ في الخابية
...
وسط البلاد ولّى سوق بومنديل
على ميا ميا ميـــــــا
والبلاد باش تمشي في شربة ماء
بدينار دينار دينـــــار
والبلاد ماشية للنّار
الحاصل النصبة للنصبة
بيناتهم نصبة
وقدّامهم نصبة
وواحد يبيع القرماشي
وشي بكردونة كاكي
والّي يقلي في القطانية
والكاكاوية على حساب ستّة
روايح تنفنف
والغلّة والليـــــم خيرات
ومازّاش السولد الشوارع كلّها فريب
...
القهاوي مليانة والديراكت يمشي
والناس تقيم وتحطّ
باش نقّاوها مالعباد ولاّ من الحكومة؟
نصبرو؟؟
لا لا نعتصمو ...ا
آشنيييي آخرتها؟؟؟
وبرشا أسئلة مالّي ما عندهاش أجوبة
...
يا سيدي تشدّ الثنية وتقول أخطانا من وسط البلاد
باقي تقّا إلّي لا يسرّ ربّي ولا العباد
حتّى إلّي في دارو يحلّ الباب يقّى في وجهو ساس ياجور
على الأربعة ميترو إلّي كانو تروتوار
زادو صفّة حوانت الحانوت للحانوت
...
والجماعة إلّي هربو مالحبس لوّحو رواحهم في البحر
فوق 5000 واحد إيطاليا على جالهم عملت القهر
بعد إلّي يحكّ راسو يحرق للطليان تقول ماشي لدار عمّو
ولاهمّتو البلاد ولاوجعتّو أمّــــو
...
الليل ليّل قلت نشوف التلفزة
:
ليبيا نايمة بالنوم
لاحسّ لا خبر
القذافي عمل بالمثل
الباب إلّي يجيك منّو الريح سدّو واستريـــح
قطع الخباط ولاكان منّو ولاصار
غمّ على الحكاية وقلّك أنا أحسن أفار
تبّو نمشي؟ واللّه ماريتوه هالنهار
سكّر اللعب
و غمّ الشعب
نساهم قبل رجالهم
لا نات لا تليفونات
عمللهم كالذبّان
سكّر عليهم الدبوسة
وقلّهم :
إشّ يا ذبّانة ما ثمّة في الدنيا كان أنا
...
البحرين واليمن شاعلين
؟؟؟
اسمعو وشوفو يا حضّار
عشنا وشفنا هالنهار
ما وراء البحر الميت تدبّ الحياة
؟؟؟
كنت تستخايلها منطقة مرّ عليها التاريخ مرور الكرام
ونساها من الجاهلية ومشات حرام
...
بدّلت القناة عرضني السفير
شباب و يحكي بالعربي
الصوردي المنقوب متاع سركووو
يلسقو في كلّ تركينة
ووقت الغصرة
يقضي قضيّة وفيه النصرة
بــــــرّا عــــــاد توّ
تونس هالنقبة في الخريطة
توّا لازم ياخذو منها الحيطة
كلّ شيرة تساسي على مصالحها
وموش كان سركوو ولاّ الطليان
بعد اللّي حالها حال العمشة في بلاد العميان
...
موش كان السفير كلّ ليلة يمدّ وجهو
تباركاللّه الوجوه ياسر
كانو حاشيين راسهم في التراب
توّا صواتهم تسرّحت ينعقو كي الغراب
البكّوش الأوّل
لابعدو لاقبلو
لمّ أحبابو وأصحابو وأنسابو
العيلة الكلّ من الأخر وفرّقهم على البلايص الفارغة
شي في الإذاعة و التلفزة
وشدّ هو من شيرة وزير التعليم
من شيرة الناطق الرسمي باسم الحكومة المذمومة
بالّه موش شي ينطقّ ؟؟؟؟
...
ما كذبش إلّي غنّا
يحكيو في قديم زمان على بلاد الشاق واق
ناسها لادين لا ملّة عايشين في النفاق
الطرش فيها حكمة
والسكات فيها ذهب
الطرش فيها حكمة
والسكات فيها ذهب
...
هيّا قلت ماعاد بيها وين
نحطّ على موضوع ثمين
هاو وزير التعليم العالي
نتابعوه ونتبّعوه
خلّي نراو آشني آخرتها؟
وأحنا لا قراية لا وذني نشّشو في الذبّان
الحال عمّال بالتوالي والخير نسمعو بيه سمعان
نسمعوه يجيبشي حاجة جديدة وعليه الأمان
حلّ فمّو وتكلم
وراس لحنينة كي يحكي يزيد يدخلك بعضك
كشاكشو خارجة
والحروف شطرها ماثمّاش
شي مفهوم وشي لازمك تلوّج عليه يمين ويسار
حاجة وحدة مكبّش فيها هوّ هاك الشعار
لازمنا نقطعو مع الماضي
قطّعلي قلبي كسّرلي كرايمي وعمل العار
...
ما عاش فيها
للصبر حدود
كيما قالت المرحومة
في البلاد هاذي كثر الهمّ ماعاش يضحّك
ولّي ينطّق
نقوم نتمرقد
حال البلاد موش باش يتقعّد
مازال الخير باطي
والعباد عمّال تشاطي وتباطي
هربنا من القطرة جينا تحت الميزاب
والماء اللّي كان ماشي للسدرة
يجري يجري طاح في حفرة
كلاه التراب
والبلاد عمّرها الخراب
قلّو آشني آخرتها ؟
قلّو أصبر تو تشوف بعينيك
...
